Соопштенија

Во периодот од 18 јуни до крајот на август 2017 г., Охридското епицентрално подрачје беше изложено на сеизмичка активност изразена преку серија на минорни до умерено силни земјотреси со магнитуден интервал M0.1 до M5.0, чие траење и повторување предизвика вознемиреност кај локалното население и туристите.

Најсилниот земјотрес се случи на денешен ден, 3 јули 2017 година во 13 часот и 18 минути по локално време, со магнитуда М5.0 и макросеизмички интензитет од VII степени според Европската Макросеизмичка Скала. Земјотресот беше проследен со силен вертикален удар и звук, слично како на експлозија, што предизвика да го почувствуваат многу луѓе внатре во куќите но и оние во зградите. Многу од оние што спиеле се разбудиле, а мнозинството се исплашиле и ги напуштиле своите домови.

Беше забележано, бранување на водата во Охридското Езеро, заматување на водата во бунарите, но и појава на брановидни формации во почвата. Со послаби макросеизмички ефекти, овој земјотрес беше почувствуван низ целата територија на Републиката но и блиските погранични подрачја.

Повеќето од градбите во градот претрпеле оштетувања. Ѕиданите градби, претрпеле значајни до многу големи оштетувања, како пукнатини на повеќе ѕидови, лизгање на ќерамиди од куќите, паѓање на оџаци, делумно уривање на ѕидови. Кај некои армирано бетонски градби се појавиле пукнатини на ѕидовите, а кај некои паѓање на големи парчиња малтер или гипс од ѕидовите.

Треба да бидеме свесни за постоењето на сеизмичката опасност и нејзината големина, и интензивно и перманентно да работиме на превземањето на мерки и активности за намалување на сеизмичкиот ризик, како преку градење на сеизмички отпорни конструкции спремни да се справат со предизвикот земјотрес, така преку подигање на свеста за заштита од земјотрес.

Според податоците со кои располага Сеизмолошката опсерваторија при Природно-математичкиот факултет во Скопје, во 00 часот и 06 минути беше почувствуван земјотрес чиј епицентар потекнува од епицентралното подрачје Тетово-Гостивар, со Рихтерова локална магнитуда, ML3.0. 

Според податоците со кои располага Сеизмолошката опсерваторија при Природно-математичкиот факултет во Скопје, во 05 часот и 36 минути беше почувствуван земјотрес чиј епицентар потекнува од епицентралното подрачје Пештани-Охрид-Струга, со Рихтерова локална магнитуда, ML3.0. Според досегашните податоци со кои располага опсерваторијата, земјотресот е почувствуван од жителите на градовите Охрид и Струга, со интензитет од III степени според Европската макросеизмичка скала.
За потребите на сеизмолошките истражувања, доколку сте го почувствувале земјотресот, Ве молиме пополнете го прашалникот за почувствуваност достапен на линкот: https://seismobsko.pmf.ukim.edu.mk/prasalnici или јавете се на 112

Нa 24 мај 2009 година, пограничното епицентрално подрачје Дојран-Кукуш беше погодено од серија земјотреси. Најсилниот земјотрес се случи во 16 часот и 17 минути UTC (Coordinated Universal Time) со Рихтерова магнитуда од 5.1 степени. Истиот беше почувствуван со максимален интензитет од 7 степени според EMSC-98. Истиот ден се случија уште 20-тина земјотреси со магнитуди кои варираа од 3.0 до 4.2 степени според Рихтер и најголем интензитет од 6 степени според EMSС-98. Постземјотресната активност продолжи и траеше уште неколку дена.

Според податоците со кои располага Сеизмолошката опсерваторија при Природно-математичкиот факултет во Скопје, ноќва во 00 часот и 22 минути, беше почувствуван земјотрес чиј епицентар потекнува од епицентралното подрачје Делчево – Берово, 120 km југоисточно од Скопје, со Рихтерова локална магнитуда ML3.1. Според досегашните податоци со кои располага опсерваторијата, земјотресот е почувствуван од жителите на градовите Пехчево, Берово и околината, со интензитет од III-IV степени според Европската макросеизмичка скала.

На 4 април 1904 година во 12 часот и 25 минути, пограничното подрачјето помеѓу Пехчево и Кресна (Р. Бугарија) било погодено од разорнувачки земјотрес со магнитуда од 7.8 степени според Рихтеровата магнитудна скала и интензитет од Х степени според EMSC-98. Ова е најсилниот земјотрес кој се случил на копнениот дел на Балкански полуостров. Најголемиот дел од населените места околу епицентарот биле целосно разурнати, куќите биле непогодни за живеење, поради што жителите живееле во шатори и колиби. Огромни материјални штети имало и низ целата држава како и во соседството, Бугарија, Србија, Албанија, Грција, каде земјотресот бил почувствуван.

Бројот на загинати и повредени достигнал до околу 150 лица. Овој земјотрес се карактеризира со разни сеизмодеформации и тоа сеизмотектонски (воочливи раседи на површината на Земјата), сеизмогравитациони (одрони, клизишта и др.) и сеизмодинамички (појава на пукнатини на хоризонтални терени). Како позначајни може да ги издвоиме големите пукнатини кои ги предизвикал како во Пехчево, така и во сите останати места каде земјотресот бил почувствуван. Станува збор за широки и длабоки пукнатини, особено оние близу до епицентарот, чиј крај неможел да се види, луѓе се спуштале но не стасувале до дното, а одекнувањето од фрлен камен се слушало цела минута. Покрај пукнатините, истиот предизвикал и појава на ликвифакција (феномен при кој почвата под дејство на динамичкото влијание на земјотресот ги губи своите механички својства и добива особини на вискозна средина) и избивање на топла и ладна вода на повеќе места, некаде таа избивала од површината нагоре до 100м, некаде предизвикала поплави, а по одредено време истата изчезнала.

На главниот земјотрес му претходеле три умерено силни до силни земјотреси со магнитуди од 5.1 до 7.3 степени, а во афтершоковата (последователна) активност, која траела речиси две години, биле забележани уште 5 земјотреси, 3 во 1904 година и 2 во 1905 година со магнитуди од 5.4 до 6.5 степени според Рихеровата скала.

Според податоците со кои располага Сеизмолошката опсерваторија при Природно-математичкиот факултет во Скопје, денес во 12 часот и 05 минути, беше почувствуван земјотрес од епицентралното подрачје Скопје. Неговата магнитуда изнесува 2.7 степени според Рихтеровата скала.

Земјотресот беше почувствуван во градот Скопје и околината со интензитет III-IV степени според Европската макросеизмичка скала.

Според податоците со кои располага Сеизмолошката опсерваторија при Природно-математичкиот факултет во Скопје, вечерва во 20 часот и 8 минути во југоисточните делови на Републиката, беше почувствуван земјотресот чиј епицентар потекнува од Р. Грција, на околу 290 км југоисточно од Скопје, со Рихтерова локална магнитуда, ML5.0

Интензитетот на почувствуваниот земјотрес според податоците изнесува  III степени според Европската макросеизмичка скала. 

На 22.3.1910 година, во 02 часот и 06 минути по локално време, во атарот на село Мрежичко, јужно од Кавадарци се случил разорен земјотрес со магнитуда МL=5,5 степени според Рихтеровата скала и интензитет I0=VIII степени според ЕМС-98. Од силината на земјотресот најмногу биле погодени селата Клинево, Рожден, Беглиште и Мрежичко каде куќите претрпеле значителни штети, а голем дел и наполно биле разрушени. Земјотресот бил почувствуван на територијата на цела Македонија, но и во градот Воден во Р. Грција. Овој земјотрес е досега најсилниот земјотрес забележан во Тиквешкиот регион.