Сеизмологијата и сеизмолошката служба во Република Северна Македонија, и покрај значајната сеизмичка активност на подрачјето, почнуваат да се развиваат нешто подоцна од другите научни и технички дисциплини.
Најраниот поттик за основање сеизмолошка служба на ова подрачје потекнува, сепак, уште од 1949 г. Таа година, од Сеизмолошкиот завод во Белград (кој тогаш дејствувал како сојузен завод) и од неговиот долгогодишен директор проф. Јеленко Михајловиќ (1869-1956 г.), покрената е иницијатива за основање на неколку нови сеизмолошки станици, меѓу кои една во Скопје. Од странство се набавени и потребните инструменти. По тој повод, тогашниот Градски народен одбор на град Скопје, со писмо бр. 704 од 18.5.1949 г., се обраќа до Сеизмолошкиот завод во Белград, барајќи да се изврши избор на локација за сеизмолошка станица во Скопје, а во консултација со компетентни стручњаци (геолози и сеизмолози). Барањето е прифатено, во Скопје доаѓа проф. Јеленко Михајловиќ и, заедно со други стручњаци, одбира локација во Кисела Вода, на североисточните падини на планината Водно, на консолидирани палеозојски варовички стени, што би овозможило добивање квалитетни сеизмограми. Меѓутоа, наскоро по ова, Сеизмолошкиот завод во Белград престанува да функционира како сојузен, продолжувајќи ја својата работа како републички (Србија). Поради тоа и кредитите што му биле дадени за нови сеизмолошки станици се запрени, а претходно набавените сеизмолошки инструменти биле складирани во неговите простории.
Основањето на сеизмолошка служба во Македонија повторно е актуелизирано во 1953 г., со предлогот за основање на неколку нови сеизмолошки станици на територијата на тогашна Југославија, даден од Сојузниот извршен совет и од Советот за просвета и култура на НР Србија. Тогашниот Секретаријат за просвета на НР Македонија и Катедрата по физика на тогашниот Филозофски факултет во Скопје го прифаќаат овој предлог. Тие ги одредуваат потребните финансиски средства за изградба и за опрема на сеизмолошка станица во Скопје, а како локација ја посочуваат онаа што е претходно избрана од проф. Јеленко Михајловиќ. Советот за просвета и култура на НР Македонија, со писмо бр. 349 од 25.2.1954 г., го упатува предметот до Извршниот совет на Народното собрание на НР Македонија, барајќи одобрување на потребните финансиски средства и препорачувајќи самата изградба на станицата и набавката на опремата да му се доверат на тогашниот Филозофски факултет во Скопје, имено на Катедрата по физика на овој факултет.
Во почетокот на 1954 г., Секретаријатот за просвета на НР Македонија и Филозофскиот факултет во Скопје ги испраќаат Ордан Печијаре (физичар) и Гиго Милески (географ) во Сеизмолошкиот завод во Белград, да ја преземат опремата која порано била наменета за сеизмолошката станица во Скопје. Тогашниот ректор на Универзитетот во Скопје, проф. д‑р Марин Каталиниќ, покажува интерес за сеизмолошката станица и посебно се залага за образованието на првите сеизмолози. Конечно, на предлог Универзитетската управа од 6.6.1955 г., Универзитетскиот совет, на своето заседание од 29.6.1955 г., донесува одлука со којашто се основа Сеизмолошката станица во Скопје, како установа при Универзитетот во Скопје. Одлуката е прифатена од Извршниот совет и Собранието на НР Македонија. На 1.11.1956 г., Универзитетскиот совет за прв в.д. управник на Станицата го именува географот Гиго Милески, кој наскоро Гиго Милески бил испратен на стручно усовршување во Сеизмолошкиот завод во Белград.
Зградата на Сеизмолошката станица во Скопје во 1957 г. Локацијата е на североисточните падини на планината Водно, во населбата Кисела Вода.